Pacific perspecive: Saunoa se tama’ita’i Samoa, o lona aiga le mafuaaga o lana su’esu’ega fa’ale-soifua mālōlōina.

For the English version of this article click here

O lo’o sailia nei e Aniva Hunkin mai le Iunivesite o Aukilani ni tamā Pasefika ma a latou aiga mo lana suesuega e fa’atatau i le soifua mālōlōina o alii.

O Aniva Hunkin, o se tamaitai Sāmoa o lo’o su’esu’e i auala e fa’aleleia atili ai le soifua mālōlōina o le fatu mo tamā Pasefika.

"Pei o le fa’alupega, (o NZ) o le atunu’u e tafe ai le suāsusu ma le meli, ou te le o malamalama la, pe ‘aisea o lo’o faia’ina ai pea tatou i lenei tausinioga?"

"Ou te mana’o ia fesoasoani o tatou tagata e si’i le isi i luga, ma o le galuega lenei a le Atua."

A’o su’esu’e ai mo lana faailoga o le Matuaofaiva i Mataupu Fa’asaienisi, na u’unaia le suesuega a Hunkin ona o mea sa ia iloa i lona lava olaga.

“Na māfua ona ou faia lenei suesuega ona o mea na tutupu i lo’u aiga ma lo’u lava olaga. Na fa’amaonia i le 2022 le maua o lo’u tamā i le ma’i fatu, Lani."

“O lea la na fa’aosofia ai a’u e saili ma su’esu’e i le a’afiaga o lenei ma’i i le lautele o nu’u Pasefika, ona ua ou va’ai atu iloa ai ua tele suesuega i le taimi nei ma o lo’o fa’aauau pea ona fa’ateleina.''

Aniva Hunkin interviews her father, Henry Hunkin about his CVD Journey. Photo/ Samoa Newshub supplied

O lo’o taula’i le su’esu’ega a Aniva Hunkin i le soifua mālōlōina tau le mafaufau o tamā Pasefika ma a latou aiga ua a’afia i ai le ma’i fatu (Cardiovascular Disease - CVD).

E aofia ai i lana suesuega le fa’aogaina o talitonuga fa’ale-Pasefika e feso’ota’i i le soifua mālōlōina, e pei o le tāua o aiga, nu’u, ma le ola fa’atuatua.

O lo’o ia su’esu’eina fo’i le a’afiaga o manatu o tamā Pasefika e fa’atatau i le soifua mālōlōina o le fatu i fa’amaumauga o lo’o iai nei.

I le taimi nei, e toalua mai le to’afa o tagata Pasefika e maliliu i le ma’i fatu o lo’o i le va o le 35 i le 65 tausaga le matutua.

I lona su’esu’ega, ua fa’amamafa ai e Hunkin tulaga e pei o le tuai ona iloa o le ma’i, le lē lava o fa’amatalaga tau aʻoaʻoga, ma fa’afitauli tau le mafaufau.

O lona fa’amoemoe o le fa’aleleia lea o nei fa’amaumauga pe si’itia le fa’alauiloaina o lenei mataupu tāua

“O le fa’ama’i pito sili ona a’afia ai le lalolagi o le ma’i o le mafaufau, pe tatou te talia lena mau pe leai, e le’i o’o tatou tagata Pasefika i se tulaga e ono talia atoatoa ai ma sailiili i ni auala e fo’ia ai lenei mataupu.

“O a foliga o le o le soifua mālōlōina tau le mafaufau i a tatou aganu’u Pasefika? E iai i totonu o a tatou aganu’u, Lani? O le ā le upu sa’o e fa’amatalaina ai? O upu e pei o le soifua mālōlōina, soifua mālōlōina o le mafaufau ma le tino – ma le anoanoa’i o nei mea uma.”

I lana fa’atalanoaga ma le PMN Samoa, na ia fa’ailoa ai ma le malosi lona naunauta’iga e su’esu’e i mafua’aga ma a’afiaga o le ma’i fatu i tamā Pasefika.

I le fa’atinoina o lenei su’esu’ega tāua, o lo’o ia taumafai e saili ni auala lelei e lagolago ai i tagata ma o latou aiga, ma o lo’o fa’amamafa mai e Aniva le mana’omia o ni tagata e faia auai i lenei su’esu’ega ina ia lelei ma atoatoa ai ana fa’amaumauga.

“O lo’o ou sailia tamā Pasefika ma a latou aiga. Mo tamā Pasefika ua fa’amaonia i ai le ma’i o le fatu, o lo’o taula’i la matou su’esu’ega i le soifua mālōlōina tau le mafaufau ma le tino."

“Pei ona ta faasoa ai le taimi ua sola, o lo’o tulaga ese le a’afiaga o tatou tagata Pasefika i le ma’i fatu."
“O le ala lea o le taua tele o lenei su’esu’ega o lo’o matou taumafai atu ai, aua o i totonu lava o le tatou lotoifale e maua ai le tali o lenei mataupu.

Watch the full interview from PMN Sāmoa here.